Qeveria e Kosovës, në mbledhjen e mbajtur në mënyrë elektronike të mërkurën e 15 marsit, ka miratuar tri nisma që kanë të bëjnë me lidhjen e marrëveshjeve me Austrinë dhe Malin e Zi.
Nisma e parë që është miratuar nga Qeveria, është ajo për lidhjen e marrëveshjes për ndryshimin dhe plotësimin e marrëveshjes për transportin ndërkombëtar rrugor të mallrave dhe të transportit të kombinuar në mes Qeverisë së Kosovës dhe asaj të Austrisë.
Po ashtu, Qeveria ka miratuar nismën për lidhjen e marrëveshjes për ndryshimin dhe plotësimin e marrëveshjes për transportin ndërkombëtar rrugor të udhëtarëve si shërbim i rregullt dhe jo i rregullt ndërmjet Qeverisë së Kosovës dhe Qeverisë së Austrisë, kështu bëhet e ditur në njoftimin e Qeverisë, transmeton Dukagjini.
Ndërsa, me Malin e Zi, Kosova ka miratuar nismën për lidhjen e marrëveshjes për shërbime ajrore.