Kryeministri në detyrë, Albin Kurti, ka njoftuar se edhe këtë vit fëmijët dhe pensionistët do të përfitojnë shtesa fundviti prej 100 eurosh.
Në një postim në Facebook, Kurti tha se mosvotimi i buxhetit nga opozita ka vështirësuar realizimin e kësaj mbështetjeje, por qeveria ka bërë të pamundurën që shtesat të procedohen para Natës së Vitit të Ri.
“Me 28 dhjetor fitojmë bindshëm dhe festojmë, pastaj me 29 dhjetor gëzohen të gjithë fëmijët e pensionistët. Sepse me fitoren tonë, Viti i Ri vjen më herët. Sikurse çdo vit, edhe sivjet kemi vendosur të mbështesim fëmijët dhe pensionistët me shtesat e fundvitit prej 100 eurove. Mosvotimi i buxhetit nga opozita na e ka vështirësuar punën tejmase, mirëpo ne e kemi bërë të pamundurën që edhe këtë vit të sigurojmë mbështetjen e fundvitit, e cila do të procedohet para natës së Vitit të Ri. Urime festat e fundvitit, dhe t’i gëzoni bashkë me familjet tuaja”, ka shkruar Kurti.