Kryetari i Komisionit Qendror të Zgjedhjeve, Kreshnik Radoniqi, ka bërë të ditur se gjashtë qendra të votimit kanë probleme me energjinë elektrike.
Radoniqi, në konferencën e dytë për media, tregoi se komuna e Istogut, Ferizajt, Vitisë, Rahovecit, Graçanicës dhe Gjilanit janë komunat që kanë probleme me energjinë, njofton Dukagjini.
“Sipas raportit të orës 11:00, në Dhomën Operative të KQZ-së janë raportuar probleme me mungesë të energjisë elektrike në 6 Qendra të Votimit që i takojnë 6 komunave: Istog, Ferizaj, Viti, Rahovec, Graçanicë dhe Gjilan. Komisionet Komunale të Zgjedhjeve kanë njoftuar KEDS-in lidhur me këtë”, u shpreh Radoniqi.
Radoniqi, mes tjerash, u shpreh se në Rahovec janë vërejtur fletëvotime që kanë shenja të dukshme në numra.
“Po ashtu, kemi pranuar njoftim nga komuna e Rahovecit, ku në Qendra të Votimit është vërejtur se fletëvotimet kanë shenja të dukshme në numra. Kjo ka shkaktuar ankesa në radhët e këshillave të vendvotimeve”, tha ai.