Kryetari i Komunës së Prishtinës, Përparim Rama, ka reaguar pas përplasjes me Ndërmarrjen Rajonale “Pastrimi” dhe sindikatën e punëtorëve të saj, duke akuzuar menaxhmentin e ndërmarrjes për keqmenaxhim dhe mungesë përgjegjësie që, sipas tij, kanë sjellë në situatën e rëndë aktuale.
Në një status të publikuar në Facebook, Rama ka bërë të ditur se në këtë situatë të krijuar, komunat aksionare të ndërmarrjes do të bashkëpunojnë për të ndihmuar njëra-tjetrën, përfshirë angazhimin e operatorëve privatë për të siguruar vazhdimësinë e mbledhjes së mbeturinave.
“Komuna e Prishtinës, në koordinim me komunat tjera aksionare, do të ndërmarrë veprime për të ndihmuar në stabilizimin e situatës në ndërmarrje, me synim që të mbrohet mirëqenia e punëtorëve, pagat dhe vendet e tyre të punës dhe të sigurohet funksionimi normal i ndërmarrjes”, deklaron Rama.
Ai theksoi se angazhimi i kompanive private në territorin e komunave është masë emergjente për të mbrojtur shëndetin publik dhe për të garantuar një mjedis të pastër për qytetarët.
Në fund të deklaratës, Rama ka paralajmëruar një hap të rëndësishëm institucional: nisjen e procedurave për decentralizimin e ndërmarrjes, duke shtuar se kjo do të bëhet në përputhje me ligjin dhe me vullnetin e lirë të komunave aksionare. Reagimi i kryetarit të Prishtinës vjen pas akuzave të forta nga menaxhmenti dhe sindikata e “Pastrimit”, të cilët kanë denoncuar bllokim të qëllimshëm të pagesave, shmangie të përgjegjësisë institucionale dhe favorizim të operatorëve privatë në kurriz të ndërmarrjes publike.