Gjykata ka shpallur sot vendimin për rastin “Veteranët”, duke dënuar me nga 1 vit burgim ish-pjesëtarët e Komisionit Qeveritar për Njohjen dhe Verifikimin e Statusit të Veteranëve të UÇK-së për keqpërdorim detyre.
Të akuzuarit e dënuar janë: Agim Çeku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Fadil Shurdhaj dhe Xhavit Jashari.
Ndërsa Nuredin Lushtaku dhe Smajl Elezaj janë liruar nga akuza.
Sipas aktakuzës, të dënuarit kanë vepruar në kundërshtim me ligjin dhe rregullat e Komisionit, duke mundësuar që persona që nuk plotësonin kriteret të përfitojnë në mënyrë të kundërligjshme statusin e veteranit të UÇK-së.
Kujtojmë që Apeli kishte kthyer lëndën në pikën zero për t’u gjykuar përsëri pas Vendimit të Themelores me të cilin i kishte liruar nga akuza të pandehurit për këtë rast.
Prokuroria Speciale që nga viti 2018 i akuzon 12 personat, në krye me Agim Çekun, për “keqpërdorim të detyrës” gjatë kohës sa ishin pjesë e Komisionit Qeveritar për Njohjen dhe Verifikimin e Statusit të Veteranëve të Luftës.
Agim Çeku dhe të tjerët akuzohen se gjatë kohës kur kanë qenë anëtarë të Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, në mënyrë të qëllimtë nuk i kanë përmbushur detyrat e tyre dhe i kanë keqpërdorur të njëjtat në mënyrë që të tjerëve t’u sjellin përfitim pasuror.
Gjithnjë sipas Aktakuzës, anëtarët e Komisionit duke vepruar në kundërshtim me ligjin dhe rregullat e përcaktuara nga vetë Komisioni ua kanë mundësuar dhe njohur personave të tjerë që të përfitojnë në mënyrë të kundërligjshme statusin e veteranit luftëtar të UÇK-së.