Real Madridi ka konfirmuar zyrtarisht se mesfushori anglez Jude Bellingham ka pësuar lëndim muskulor në këmbën e majtë gjatë ndeshjes së La Ligës kundër Rayo Vallecanos.
Ndeshja, e vlefshme për javën e 22-të të sezonit 2025/26, u mbyll me fitore 2-1 për madrilenët, duke e ngushtuar diferencën me liderin Barcelona në vetëm një pikë. Megjithatë, fitorja u zbeh nga shqetësimet për gjendjen fizike të Bellingham.
Në njoftim, Real Madridi bëri të ditur se pas ekzaminimeve mjekësore të kryera nga stafi i klubit, lojtari është diagnostikuar me çarje të muskulit semitendinosus në këmbën e majtë. Klubi shtoi se gjendja e tij do të monitorohet vazhdimisht gjatë procesit të rikuperimit.
Rrezikon mungesë deri në një muaj
Edhe pse klubi nuk dha një afat konkret për rikthimin e tij, e përditshmja spanjolle AS raporton se Bellingham mund të mungojë rreth një muaj.
Sipas raportimit, periudha e rikuperimit mund të zgjasë nga tre deri në pesë javë, varësisht nga ecuria e dëmtimit në ditët në vijim.
Lëndimi vjen në një moment vendimtar të sezonit, me Real Madridin në garë të ngushtë me Barcelonën për kreun e tabelës.
Për më tepër, Bellingham pritet të mungojë edhe në përballjen dy ndeshëshe të fazës eliminatore të Ligës së Kampionëve kundër Benfikës, e cila zhvillohet më vonë këtë muaj.