Kuvendi i Kosovës mori vëmendjen e gazetës prestigjioze “The Guardian”, por jo për të mirë.
Kjo gazetë ia kushtoi një tekst përplasjes fizike në mes të përfaqësuesve të pushtetit dhe opozitës, e cila ndodhi kur kryeministri i Kosovës, Albin Kurti, po mbante fjalim për situatën në veri.
“Deputeti Mergim Lushtaku nga Partia Demokratike e Kosovës, i është afruar Kurtit teksa ai po fliste dhe i ka hedhur ujë, duke shkaktuar sherrin. Më herët, zëvendësi i Kurtit, Besnik Bislimi, kishte grisur një vizatim që tallte Kurtin që opozita i kishte dhënë kryeministrit”, thuhet në artikullin e The Guardian.
Pas rrahjes, pozita e opozita e fajësuan njëra-tjetrën për dhunën e shkaktuar. Pas pauzës, Kuvendi filloi seancën përsëri, por kësaj here foltorja u bllokua nga opozita, megjithëse kryeministri Kurti kishte hequr dorë nga fjala e tij, si formë për ta qetësuar situatën.