Zëvendëskryetari i Këshillit të Sigurimit Rus, Dmitry Medvedev, të dielën e 11 dhjetorit ka thënë se Rusia po prodhon më shumë armë shkatërruese për t’iu kundërvënë vendeve perëndimore që mbështesin Ukrainën.
“Armiku ynë është i rrënjosur në Evropë, Amerikën e Veriut, Japoni, Australi, Zelandën e Re dhe një numër të tërë vendesh të tjera që janë betuar për besnikëri ndaj nazistëve të sotëm”, ka shkruar në Telegram Zëvendëskryetari i Këshillit të Sigurimit Rus.
Tutje Medvedev ka shtuar se “Kjo është arsyeja pse ne po nxisim prodhimin e mjeteve më të fuqishme të shkatërrimit, duke përfshirë ato të bazuara në parime të reja”.
Zyrtarët rusë shpesh i referohen udhëheqjes së Ukrainës si “naziste”, duke e përdorur këtë si një justifikim për pushtimin e tyre. Ky pretendim se Ukraina drejtohet nga e djathta ekstreme është hedhur poshtë si një “gënjeshtër e thjeshtë” nga ekspertët.
Medvedev ka potencuar se armët do të bazoheshin në “parime të reja fizike”, pa detajuar saktësisht se çfarë ishin këto, raporton euronews.
AFP ka raportuar se kjo mund të jetë në lidhje me një gjeneratë të re të armëve hipersonike që Rusia ka zhvilluar vitet e fundit.
Armët e tilla fluturojnë me shpejtësi jashtëzakonisht të larta, duke i bërë ato jashtëzakonisht të vështira për t’i kapur nga sistemet mbrojtëse.