Agjencia e Menaxhimit të Emergjencave ka njoftuar për një përkeqësim të situatës në vend si pasojë e temperaturave ekstreme dhe erërave të forta.
Vetëm në 8 orët e fundit janë evidentuar gjithsej 29 vatra zjarri në territorin e Kosovës.
Sipas Qendrës Operative të Agjencisë, 17 nga këto vatra janë lokalizuar, ndërsa 12 mbeten ende aktive dhe nën monitorim të vazhdueshëm nga njësitë përkatëse.
Institucionet përgjegjëse u bëjnë apel qytetarëve që të tregojnë kujdes të shtuar dhe të shmangin ndezjen e zjarreve në ambiente të jashtme.
Po ashtu, çdo rast i zjarrvënieve duhet të raportohen menjëherë në numrat emergjent 112, 193 dhe 192.
Agjencia e Menaxhimit të Emergjencave thekson se është në gatishmëri të plotë, bashkë me Njësitë e Zjarrëfikjes dhe Shpëtimit, si dhe me Policinë e Kosovës, për të ndërhyrë dhe menaxhuar çdo situatë emergjente gjatë kësaj vale ekstreme të të nxehtit.