Rusia do të bëjë ndryshime në doktrinën e saj mbi përdorimin e armëve bërthamore, në përgjigje të asaj që ajo e konsideron si përshkallëzim perëndimor në luftën në Ukrainë, ka cituar media shtetërore të ketë thënë zëvendësministri i Jashtëm rus, Sergei Ryabkov.
Doktrina ekzistuese bërthamore, e përcaktuar në një dekret nga presidenti Vladimir Putin në vitin 2020, thotë se Rusia mund të përdorë armë bërthamore në rast të një sulmi bërthamor nga një armik, ose një sulmi konvencional që kërcënon ekzistencën e shtetit.
Putini ka thënë në qershor se doktrina bërthamore ishte një “instrument i gjallë” që mund të ndryshonte, në varësi të ngjarjeve botërore.
Komentet e Ryabkov të dielën janë shenja më e qartë se ndryshimet do të bëheshin vërtet.
“Puna është në një fazë të avancuar dhe ka një qëllim të qartë për të bërë korrigjime”, ka cituar agjencia shtetërore e lajmeve TASS të ketë thënë Ryabkov.
Ai ka shtuar se vendimi është “i lidhur me kursin e përshkallëzimit të kundërshtarëve tanë perëndimorë” në lidhje me konfliktin në Ukrainë.
Moska akuzon Perëndimin se përdor Ukrainën si një përfaqësues për të zhvilluar luftë kundër saj, me qëllimin për t’i shkaktuar një “disfatë strategjike” Rusisë dhe për ta copëtuar atë, raporton Reuters.
Shtetet e Bashkuara dhe aleatët e tyre e mohojnë këtë, duke thënë se po ndihmojnë Ukrainën të mbrohet kundër një lufte agresioni të stilit kolonial nga Rusia.