Kryeministri në detyrë i Malit të Zi, Dritan Abazoviq, ka njoftuar se të mërkurën e 7 shtatorit, ai së bashku me drejtorin e të Ardhurave dhe Administratës Doganore, Rade Milošević, kanë monitoruar nga afër konfiskimin e cigareve të paligjshme në vlerë prej 3 milionë eurosh.
Abazoviq ka shkruar se qeveria e tij është duke i dhënë fund krimit dhe kontrabandës së cigareve.
“Gjatë qeverisjes që unë udhëheq kemi një rritje 70% të të ardhurave të ligjshme nga cigaret”, ka shkruar ai në rrjetin e tij social Facebook.
Por, sipas Abazoviq-it, rezultatet e para të ndalimit të kontrabandës janë parë edhe nga arka e shtetit të Malit të Zi, e cila i mbledh të hyrat nga cigaret e ligjshme.
“Për 4 muaj mbi 15 milionë euro të mbledhura, [nga tatimi ndaj cigareve]”, ka thënë Abazoviq.
Ai ka bërë thirrje që produktet e duhanit duhet të hyjnë në Malin e Zi vetëm nëpërmjet rrugëve ligjore, por ka shtuar se kjo arrihet vetëm nëse i jepet fund krimit të organizuar dhe kontrabandës.