Kryeministri i Kosovës, Albin Kurti në seancën e së enjtes në Kuvendin e Kosovës është pyetur për çështjen e marrëveshjes së demarkacionit me Malin e Zi, nga deputeti i LDK-së, Driton Selmanaj.
Ai ka pyetur se cili është qëndrimi i Qeverisë Kurti në lidhje me zotimet për rishikimin e kësaj marrëveshjeje?
Kurti është përgjigjur duke thënë se qeveritë e kaluara kanë bërë së pari ratifikim ndërsa pastaj rishikim, ndërsa ka thënë se parimi i qeverisë së tij, së pari është rishikim, pastaj ratifikim.
“Kosova dhe Mali i Zi kanë një marrëveshje të nivelit të presidentëve, por mendimi i subjekteve politike që udhëheq unë së pari është rishikim pastaj ratifikim. Qeveritë e kaluara bënin ratifikim, pastaj rishikim e korrigjim. Ne së bashku me Malin e Zi kur të pajtohemi do të bëjmë rishikimin, dokumentet janë të qarta, ekspertët vendorë kanë punuar në këtë drejtim”, ka vijuar Kurti.
Ndërkaq, pas kësaj përgjigjeje të Kurtit ka pasur edhe pyetje shtesë nga deputeti Selmanaj, i cili ka thënë se Kurti di të bëjë lojë të fjalëve dhe sipas tij “ai nuk po kthen përgjigje konkrete”.
Ai e ka quajtur “mashtrues” Kurtin.
“Mashtrimin edhe gënjeshtrën e ke bërë standard, do të rrëzohesh prej kryeministrit shumë shpejt. Ti je mashtrues”, ka thënë Selmanaj.
Ndërsa, Kurti ka thënë se Komisioni i Malit të Zi e ka pasur misionin për përcaktimin e kufirit, ndërsa Komisioni i Kosovës e ka pasur mision shënjimin e kufirit.