Deputeti i Lidhjes Demokratike të Kosovës(LDK), Driton Selmanaj, ka thënë se largimi i serbëve nga institucionet e Kosovës, ka qenë projekt disa vjeçarë i politikës fashiste të Serbisë.
“Ajo çka është tepër shqetësuese tanimë pjesë e këtij plani me ose pa vetëdije është bërë edhe qeveria e Kosovës me Kryeministër Kurtin. Qëllimi i këtij projekti është që procesi 10 vjeçarë i dialogut të shpallet i dështuar, dhe të gjitha marrëveshjet e arritura të anulohen”, ka shkruar Selmanaj.
Sipas Selmanajt, kjo situatë “pastaj do nxirrte nevojën për organizimin e një Konference Ndëkombëtare e cila do të vendoste në tavolinë të gjitha opcionet e mundshme dhe me këtë do e legjitimonte narrativen e Serbisë që shteti i Kosovës është projekt i pa përmbyllun”.
“Kjo do ishte fatale për shtetin tonë. Kjo do vinte në dilemë pakon e Ahtisarit, Aktin e shpalljes së pavarësisë së Kosovës, mbi 100 njohjet si dhe vendimin e Gjykatës Ndërkombëtare të Drejtësisë me 2010 e cila kishte vulosur ligjshmërinë e shpalljes së pavarësisë së Kosovës, me konstatimin se “Shpallja e Pavarësisë së Kosovës me 17 shkurt të vitit 2008 nuk e ka shkelur të drejtën ndërkombëtare”, ka shtuar deputeti i LDK-së.
Mes tjerash, Driton Selmanaj ka theksuar faktin se serbët janë bërë pjesë e policisë së Kosovës, sistemit gjyqësorë e prokurial, doganave dhe institucioneve tjera, jo me dëshirën e tyre dhe të Serbisë, por pas presionit të madh dhe ndërmjetësimit ndërkombëtarë.
Deputeti i LDK-së, Driton Selmanaj, ka shtuar se vetëm kordinimi shumë i ngushtë me SHBA-te dhe aleatët perëndimorë mund t’i jep epilog marrëveshjes finale për normalizimin e marrëdhënieve Kosovë – Serbi.