Deputeti nga radhët e Lidhjes Demokratike të Kosovës (LDK), Driton Selmanaj në seancën e 22 dhjetorit në Kuvendin e Kosovës ku në rend dite është shqyrtimi i dytë i projektligjit për zyrtarët publikë dhe shqyrtimi i dytë i projektligjit për pagat në sektorin publik ka thënë se LDK-ja shpreh shqetësimet e saj për qasjen e kësaj qeverie në raport me 80 mijë njerëz që punojnë në administratën e Kosovës.
“Shembull eklatant si një qeveri provon të shkatërrojë një sistem që është ndërtuar për vite në Kosovë”, ka thënë Selmanaj.
Sipas Selmanajt, këtë sistem e kanë sjellur ndërkombëtarët, nuk e kanë gjetur ata vetë ashtu.
Ndër të tjera, ai ka thënë se me këtë çështje shkatërrohet administrata shtetërore, pasi me këtë ligj bëhet diferencimi i saj.
“Afati katërvjeçar i secilës pozitë udhëheqëse në Kosovë është mundësi për korrupsion e nepotizëm, askush në Kosovë më nuk është i sigurt që do të jetë pjesë e administratës pas katër vitesh”, ka vijuar ai.
Ai ka pyetur tutje se “ku është interesi që njerëzit të bëhen pjesë e administratës shtetërore pas këtij ligji?”
Sipas tij, shumica e deputetëve në sallë të kuvendit nuk janë të vetëdijshëm se për cilin projekt-ligj po votojnë dhe se çfarë do të shkaktojë në të ardhmen.