Ministria e Punëve të Jashtme dhe Diasporës e Republikës së Kosovës ka reaguar pas arrestimit të fundit të një shtetasi kosovar nga autoritetet serbe, duke e cilësuar këtë si pjesë të një fushate të rrezikshme dhe të paprovokuar kundër qytetarëve të Kosovës.
MPJD-ja ka konfirmuar se qytetari Behar Preniqi u ndalua dje në pikën kufitare Batrovci, në kufi mes Kroacisë dhe Serbisë.
Sipas MPJD-së, ky është vetëm rasti i fundit në një varg arrestimesh arbitrare që Serbia po kryen në mënyrë sistematike, në kundërshtim të plotë me të drejtën ndërkombëtare dhe standardet për të drejtat e njeriut.
Ministria ka konfirmuar se Zyra Ndërlidhëse e Kosovës në Serbi është angazhuar menjëherë pas kontaktit me familjen e Preniqit. Kjo zyrë ka dërguar kërkesë zyrtare për të konfirmuar arrestimin dhe për të sqaruar arsyet e ndalimit të tij.
Po ashtu, rasti është përcjellë edhe te Delegacioni i BE-së në Serbi dhe te misionet diplomatike të vendeve të Quint-it.
“Në rast se ndaj z. Preniqi vendoset masa e paraburgimit dhe iniciohet procedurë penale, Zyra Ndërlidhëse do të kërkojë leje për vizitë zyrtare në vendin e ndalimit”, thuhet në njoftim.
Thirrje qytetarëve: Mos udhëtoni përmes Serbisë
Në reagimin e saj, MPJD u bën thirrje të gjithë qytetarëve të Republikës së Kosovës që të shmangin udhëtimet përmes territorit të Serbisë, për të garantuar sigurinë dhe mirëqenien e tyre.
MPJD ka kërkuar gjithashtu nga Bashkësia Ndërkombëtare që të reagojë me vendosmëri ndaj këtyre praktikave që, sipas saj, përfaqësojnë veprime represive dhe destruktive nga ana e Serbisë.