Ministria e Punëve të Jashtme dhe Diasporës e Republikës së Kosovës ka njoftuar se ish-deputeti i Lëvizjes Vetëvendosje, Gramos Agusholli, është ndaluar nga autoritetet serbe më 26 maj në pikën kufitare në Merdarë, ndërsa ndodhej në transit drejt Sllovenisë.
Sipas MPJD-së, menjëherë pas marrjes së informatës për ndalimin, Zyra Ndërlidhëse e Kosovës në Serbi ka kontaktuar me misionet diplomatike të vendeve të KUINT-it dhe Zyrën e BE-së në Beograd. Po ashtu, janë njoftuar edhe përfaqësitë diplomatike të këtyre vendeve në Kosovë.
“Sot paradite, më 26 maj 2025, jemi njoftuar për ndalimin e ish-deputetit të Kuvendit të Republikës së Kosovës, z. Gramos Agusholli, nga autoritetet e Serbisë në pikën kufitare në Merdarë, ndërsa ishte në tranzit drejt Sllovenisë.
Lidhur me këtë rast, Zyra Ndërlidhëse e Republikës së Kosovë në Serbi ka njoftuar misionet diplomatike të shteteve të KUINT-it dhe Zyrën e BE-së në Beograd.
Ministria e Punëve të Jashtme dhe Diasporës ka njoftuar menjëherë misionet diplomatike të shteteve të KUINT-it dhe Zyrën e BE-së në Kosovë, si dhe ka ndërmarrë hapat e nevojshëm për të siguruar informacione të plota dhe zyrtare në lidhje me rastin.
MPJD dënon fuqishëm këtë veprim arbitrar të autoriteteve serbe dhe i bën thirrje Bashkësisë Ndërkombëtare të reagojë menjëherë, duke kërkuar lirimin e menjëhershëm të z. Gramos Agusholli dhe ndalimin e praktikave të tilla represive, të cilat bien ndesh me parimet themelore të të drejtës ndërkombëtare dhe me konventat ndërkombëtare për të drejtat e njeriut.
Ministria e Punëve të Jashtme dhe Diasporës do të mbajë të informuar të gjithë partnerët ndërkombëtarë për çdo zhvillim të mëtejshëm në lidhje me këtë rast. Çdo informacion i ri do të shpërndahet menjëherë pas konfirmimit zyrtar”, thuhet në njoftim.