Presidenti i Shteteve të Bashkuara të Amerikës, Donald Trump, dhe kryeministrja e Japonisë, Sanae Takaichi, kanë nënshkruar të martën në Tokio një marrëveshje kornizë për sigurimin e furnizimit me minerale të rralla.
Kjo marrëveshje synon të forcojë bashkëpunimin ekonomik mes dy vendeve dhe të dobësojë varësinë globale nga Kina, e cila aktualisht kontrollon rreth 90 për qind të tregut botëror të këtyre mineraleve – përbërës kyç në prodhimin e pajisjeve elektronike.
Edhe pse as Trump dhe as Takaichi nuk e përmendën drejtpërdrejt Kinën gjatë nënshkrimit, marrëveshja shihet si një hap strategjik ndaj politikave kufizuese të Pekinit, i cili kohëve të fundit ka kufizuar eksportet e disa mineraleve duke rrezikuar zinxhirin global të furnizimit.
Ndërkohë, Trump dhe presidenti kinez, Xi Jinping, pritet të takohen të enjten në Samitin e Bashkëpunimit Ekonomik Azi-Paqësor në Korenë e Jugut, ku do të diskutojnë mundësinë e një marrëveshjeje për zbutjen e tarifave dhe kufizimeve tregtare mes dy vendeve.