Shtetet e Bashkuara të Amerikës kanë vendosur të mërkurën sanksione ndaj dy kompanive më të mëdha të naftës në Rusi, duke i bërë thirrje Moskës të pranojë një armëpushim të menjëhershëm në luftën me Ukrainën.
Presidenti amerikan, Donald Trump, kishte paralajmëruar për javë të tëra mundësinë e sanksioneve kundër Rusisë për shkak të vazhdimit të luftës, por vendimi u mor vetëm tani, raporton CNN.
“Tani është koha për të ndaluar vrasjet dhe për një armëpushim të menjëhershëm”, tha Sekretari amerikan i Thesarit, Scott Bessent, në një deklaratë zyrtare.
Ai shtoi se për shkak të refuzimit të presidentit rus, Vladimir Putin, për t’i dhënë fund “kësaj lufte të pakuptimtë”, Departamenti i Thesarit ka vendosur sanksione ndaj dy kompanive më të mëdha të naftës që, sipas tij, “financojnë makinën e luftës së Kremlinit”.
Bessent theksoi se SHBA-ja është e përgatitur të ndërmarrë masa të tjera nëse Moska nuk ndalon agresionin ndaj Ukrainës.
Pas shpalljes së sanksioneve, presidenti Trump njoftoi se ka anuluar një takim të planifikuar me Putinin në Budapest.
“Anuluam takimin me presidentin Putin. Thjesht nuk dukej e drejtë për mua. Nuk dukej se do të arrinim aty ku do duhej të arrinim. Kështu që e anulova”, deklaroi Trump.