I pari i Prishtinës, Përparim Rama, iu ka bërë thirrje qytetarëve të Prishtinës se për shkak të kushteve atmoseferike të kenë kujdes të shtuat gjatë lëvizjes me automjete.
Gjithashtu, Rama, iu ka bërë thirrje që të mos dalin nëse nuk është e domosdoshme.
“Ju bëj thirrje qytetarëve të kenë kujdes të shtuar gjatë lëvizjeve me automjete, dhe të mos dalin nëse nuk është e domosdoshme, për shkak të kushteve atmosferike”, ka shkruar Rama në Facebook.
Gjithashtu, edhe drejtori i Emergjencave në Komunën e Prishtinës, Lulëzim Fushtica, ka folur për Radio Dukagjini dhe ka konfirmuar se stuhia e shiut ka krijuar disa dëm në komunën e Prishtinës që sipas tij ajo ka rrezuar disa lisa.
Ndërsa sipas tij institucionet përkatëset kanë dalë në vendin e ngjarjes e janë duke i larguar drunjte nga rruga.
“Gjendja për momentin është e stabilizuar, kemi disa pemë të rrezuar në kryeqytet jemi duke intervenuar në rrugën Luna Haradinaj, rrugën Agim Ramadani, në Bregun e Dellit”, ka thënë ai.
Stuhia e fortë në Prishtinë ka shkaktuar thyerjen e pemëve në Aeroportin Ndërkombëtar të Prishtinës “Adem Jashari”.
Ndërkaq, KEDS njofton se në një pjesë të madhe të Kosovës, një numër i caktuar i daljeve janë jashtë funksionit.
“Si pasojë e këtij moti, i përcjellur me shi e erëra të forta, rajonet më të prekura në rrjetin elektroenergjetik janë Gjakova, Prizreni, Ferizaj, si dhe një pjesë e Pejës dhe Prishtinës”, njofton KEDS.