Shoqata e Prokurorëve të Republikës së Kosovës ka reaguar kundër gjuhës ofenduese të avokatit Besnik Berisha ndaj prokurorit Rasim Maloku.
Në reagimin e tyre Shoqata ka dënuar këtë sjellje dhe ka kërkuar masat e nevojshme për të mbrojtur integritetin e prokurorit Maloku dhe autoritetin e sistemit prokurorial.
“Me këtë rast, Shoqata e Prokurorëve dënon ashpër qasjen dhe veprimet e avokatit Besnik Berisha, duke shpërndarë gjuhën e urrejtjes, ofendimeve dhe kërcënimit ndaj prokurorit Maloku, në kundërshtim me parimet e përcaktuara, me ç’rast standardet e përcaktuara me Kodin e Procedurës Penale dhe me praktikat ndërkombëtare, të zbatueshme në Kosovë, ndalojnë qasjen ku avokatët, prokurorët apo gjykatësit, i trajtojnë çështjet penale publikisht nëpër media, duke ofenduar dhe përhapur të pavërteta”, thuhet në reagim.
Shoqata e Prokurorëve ka kërkuar nga Oda e Avokatëve të Kosovës (OAK) të marrin masa disiplinore ndaj avokatit Berisha.
“Shoqata e Prokurorëve të Republikës së Kosovës kërkon nga Oda e Avokatëve të Kosovës që të ndërmarrë të gjitha veprimet e nevojshme për të iniciuar procedura disiplinore për shkelje të Kodit dhe Etikë profesionale të avokatëve si dhe legjislacionit pozitiv, ku përmes veprimeve të tij avokati Berisha ka denigruar njërën ndër hallkat kryesore të sistemit të drejtësisë përkatësisht sistemit prokurorial”, thuhet në njoftim.
Gjithashtu, Shoqata e Prokurorëve e ka ftuar Prokurorinë Themelore në Prishtinë të “analizoj gjuhën e ultë të urrejtjes, ofenduese dhe kërcënuese të avokatit Berisha ndaj prokurorit Rasim Maloku dhe të ndërmarrë të gjitha veprimet sipas Ligjit të aplikueshëm në Kosovë”.