Një shpërthim është raportuar të dielën në një kodrinë në Vushtrri.
Sipas Policisë, fillimisht ishte raportuar për një zjarr, pas të cilit është dëgjuar edhe një detonim.
Njësitë policore dhe zjarrfikësit kanë dalë menjëherë në vendin e ngjarjes, duke lokalizuar zjarrin. Gjatë kontrollit, është vërejtur një gropë e krijuar nga shpërthimi, ku janë gjetur disa pjesë armësh dhe municioni.
Sipas raportit 24-orësh të Policisë, janë konfiskuar: dy karikatorë armësh, disa këllëfë armësh, një shufër metalike, si dhe municion i llojeve të ndryshme.
Rasti është cilësuar si “shkaktim i rrezikut të përgjithshëm” dhe “armëmbajtje pa leje”, ndërsa hetimet po vazhdojnë në koordinim me prokurorin e rastit.