Kandidati i PDK-së për kryetar të Lipjanit, Shukri Buja, ka publikuar një video, ku krahasohen arritjet e tij gjatë dy mandateve si kryetar komune me gjendjen e sotme të Magurës dhe fshatrave përreth.
Në video theksohet se sot banorët e Magurës përballen me sfida të përditshme: shtrati i lumit i lënë pa mirëmbajtje, trotuare të bllokuara, parqe të shkatërruara, shkolla të vjetra të harruara e mbuluara nga ferra, kopshtet pa funksion, rrugët e dëmtuara dhe mungesa e ujit të pijshëm.
“Këto nuk janë thjesht probleme, por plagë të përditshme që kërkojnë zgjidhje të menjëhershme dhe të përgjegjshme”, thuhet në video.
Në kontrast, përkujtohen investimet e realizuara në kohën e Shukri Bujës, si asfaltimi i rrugëve në Magurë dhe Blinajë, kanalizimet në Magurë, Vrellë e Medevc, montimi i pompës së ujit, rehabilitimi i rrjetit të ujësjellësit për disa fshatra si dhe renovimi i QKMF-së në Magurë.
“Magura e Shukri Bujës ishte Magura e investimeve dhe zhvillimit, ndërsa sot është lënë pas dore me probleme të shumta”, thuhet në videon e publikuar.
Shukri Buja vlerëson se rikthimi i tij në krye të komunës është garanci për zhvillim të qëndrueshëm dhe për një Magurë që nuk braktiset, por ndërtohet.