Sindikata e Pavarur e Doganës së Kosovës ka bërë të ditur se doganierët e sistemuar në pikën kufitare Jarinjë, që nga e shtuna e 10 dhjetorit, janë në krye të detyrës zyrtare pa pasur mundësi që të kryhen ndërrimet me oficerët e tjerë doganorë.
Sindikata njofton se ndërrimet me oficerët doganorë nuk po mund të bëhen për arsye të bllokimit të rrugës në këtë pjesë të Republikës së Kosovës.
“Sindikata e Pavarur e Doganës së Kosovës si zë i fuqishëm i anëtarësisë së saj bashkëndjen punën me doganierët e sistemuar në PKK Jarinjë. Sindikata njëherit i përgëzon institucionet e Republikës së Kosovës e në veçanti doganierët e policët për vendosmërinë, guximin dhe përkushtimin e tyre drejt shtrirjes dhe sundimit të ligjit në tërë territorin e Republikës së Kosovës” thuhet në njoftim.
Ndër të tjera, sindikata e Pavarur e Doganës së Kosovës uron që doganierët, policët dhe të gjithë qytetarët e Kosovës, të cilët janë prezent në atë pjesë, që të mos kenë pasoja. Ndërkaq fton institucionet kompetente që të kujdesen për sigurinë, kushtet e punës dhe shëndetin e doganierëve, policëve dhe qytetarëve atje.
Ndryshe, të premten e 16 dhjetorit, bëhen shtatë ditë që serbët lokalë kanë ngritur barrikada në shenjë pakënaqësie me arrestimin e një ish-pjesëtari serb të Policisë së Kosovës.
Të njëjtat barrikada vazhdojnë të qëndrojnë ende të palëkundura, përkundër thirrjeve ndërkombëtare që ato të hiqen menjëherë.