Kolektivi për Mendim dhe Veprim Feminist organizon sot protestë gjithëpopullore me moton “nuk ka paqe pa sigurinë e grave”.
Protesta që nis nga ora 18:00 në sheshin “Zahir Pajaziti” në Prishtinë, do të organizohet në mbrojtje të grave pas rastit të fundit të vrasjes së Liridona Murselit, ngjarje që dyshohet se u porosit nga bashkëshorti i saj, Naim Murseli.
“Shoqe, shokë e bashkëqytetare/ë, nesër po mblidhemi në Termokiss, duke filluar nga ora 18:00, për t’i bërë parapërgatitjet e protestës gjithëpopullore, të thirrur për të martën kundër dhunës ndaj vajzave dhe grave dhe femicidit”, thuhet në njoftimin e tyre.
Sipas njoftimit të organizatës, thuhet se “Puna organizative, e cila është punë tërësisht vullnetare, kryhet në saje të kontributit të gjithsecilës e gjithsecilit nga ne, pjesë të grupit ad hoc organizativ. Ne si grup, aktualisht i përbërë nga aktiviste/ë të pavarura dhe anëtare/ë të Kolektivit Feminist, ju ftojmë në këtë punëtori të hapur këdo që ka vullnet të kontribuojë në organizim, që beson në vlera feministe të drejtësisë shoqërore dhe për lirinë dhe sigurinë e çdokujt”.
Liridona Murseli u vra të mërkurën në një inskenim si grabitje që dyshohet se u porosit nga bashkëshorti i saj. Për rastin, përveç Naim Murselit, janë arrestuar edhe dy të tjerë, njëri prej të cilëve dyshohet të jetë dorasi.