Ministri i Punëve të Brendshme, Xhelal Sveçla, ka deklaruar këtë të martë se format e terrorizmit të dhunshëm, siç është e djathta ekstreme dhe etnonacionalizimi janë në rritje.
Sipas të parit të MPB-së, këto akte kriminale janë duke paraqitur kërcënim për sigurinë në vend.
Këto deklarata Sveçla i dha në konferencën ndërkombëtare me temën “Ndërtimi i Reziliencës: Programet R&R për Ekstremistët dhe Luftëtarët e Huaj në Kosovë dhe Itali’’.
“Përveç ekstremizmit të motivuar nga keqpërdorimi i religjionit që ka qenë prezent deri tani, format e tjera të terrorizmit dhe ekstremizmit të dhunshëm si e djathta ekstreme apo etnonacionalizmi janë në rritje. Këto akte kriminale po paraqesin kërcënim për sigurinë në Kosovë, përfshirë edhe sulmet e shtyra nga grupet politike në vend”, ka deklaruar ministri Sveçla.
Svecla ka thënë se shteti i Kosovës ka bërë “hapa të mëdhenj”, në trajtimin e këtyre problemeve.
“Në bazë të punës së deritanishme në luftimin e terrorizmit, institucionet e Kosovës kanë bërë hapa të mëdhenj në trajtimin e këtij problemi, në trajtimin e çështjeve në parimet e bazuara të njeriut dhe nevojës për të qeverisur në një shoqëri pa dallim”, ka thënë Sveçla.
Për ta luftuar terrorizmin, Sveçla ka thënë se Kosova i ka përdorur dy qasje.
“Republika e Kosovës ka qenë shumë aktive në marrjen e masave në parandalimin e terrorizmit dhe ekstremizmit. Për t’u ballafaquar me ekstremizmin dhe terrorizmin, Kosova ka përdorur dy qasje kryesore, që përfshin hetimin, arrestimin dhe dënimin e atyre që janë bashkuar në konflikte të huaja përkrah organizatave terroriste”, ka thënë ai.