Ministri i Brendshëm, Xhelal Sveçla, ka njoftuar se të gjitha barrikadat që ishin vendosur të dielën e 31 korrikut në Veri të Kosovës janë larguar.
Me anë të një postimi në llogarinë e tij në Facebook, ministri Sveçla ka konfirmuar se është kthyer plotësisht liria e lëvizjes në pikat kufitare në Jarinjë e Bërnjak.
Pas largimit të barrikadave, është shtyrë edhe aplikimi i vendimit për reciprocitetin e letërnjoftimeve me Serbinë deri më një shtator e po ashtu edhe vendimi për të zëvendësuar targat ilegale.
“Barrikadat e vendosura nga strukturat ilegale serbe mbrëmë, 15 minuta pas lëshimit të sistemit të alarmit dhe të shpërndara në 9 lokacione të ndryshme në veriun e vendit, tashmë janë larguar plotësisht nga vetë ata. Liria e lëvizjes është e plotë dhe pikat kufitare Jarinje dhe Bërnjak janë të hapura për qytetarët”.
Sveçla po ashtu ka theksuar se grupe të maskuara e me armë të gjata të cilët sipas tij udhëhiqen nga Beogradi dhe të ardhur nga Serbia, kanë filluar sulmet ndaj qytetarëve të vendit duke i rrahur brutalisht dhe të njëjtit kanë gjuajtur edhe të hënën e një gushtit ndaj zyrtarëve policorë.
Kjo siç thotë ai, “me qëllim të vrasjes së tyre”.
“Këto sulme ishin të përgatitura që një kohë të gjatë e këto përgatitje kulmuan nga takimet në Beograd e në Rashkë. Sulmet e tilla nuk i kontribuojnë stabilitetit të vendeve tona dhe rajonit sepse mbi të gjitha Qeveria jonë ka marrë dy vendime duke respektuar ligjet vendore dhe ndërkombëtare”.
“Siç jemi zotuar edhe mbrëmë, si Qeveri e Republikës së Kosovës, me largimin e barrikadave dhe sigurimin e lirisë së lëvizjes për qytetarët tanë, ne e zhvendosëm zbatimin e vendimeve për datën 1 shtator 2022, me qëllim të ruajtjes së stabilitetit në vend dhe rajon”, ka shkruar Sveçla.