Ministri i Punëve të Brendshme, Xhelal Sveçla, e ka përgëzuar Inspektoratin Policor dhe Policinë e Kosovës për aksionin në kuadër të luftës ndaj krimit të organizuar, i zhvilluar më datën 5 tetor të vitit 2022 në disa komuna të Republikës së Kosovës.
Më tej, i pari i Punëve të Brendshme të Kosovës ka theksuar se nuk do t’i lejojnë zyrtarët shtetërorë që ta keqpërdorin misionin i cili është vetëm për t’u shërbyer qytetarëve.
“Lufta jonë ndaj krimit të organizuar dhe çdo lloj krimi tjetër do të vazhdojë, pandalshëm, pa asnjë kompromis, dhe të gjithë do të trajtohen të barabartë para ligjit pavarësisht funksionit që bartin”, ka shkruar Sveçla në Facebook.
“Po punojmë në vazhdimësi për ngritje të efikasitetit por edhe të integritetit brenda secilit institucion, andaj aksioni i mbrëmshëm e dëshmon vullnetin dhe gatishmërinë për të jetësuar këtë”.
“Mirëqenia dhe siguria e qytetarëve të Republikës së Kosovës janë prioritet. Mbi këtë parim do të vazhdojmë të luftojmë secilën dukuri apo individ që minon sundimin e ligjit apo që cenon jetën e qytetarëve, rendin dhe sigurinë publike”, ka shkruar ai.
Ai ka përfunduar duke i inkurajuar qytetarët që të bashkëpunojnë me institucionet e sigurisë, sepse sipas tij vetëm kështu sigurohet sundimi i ligjit në çdo fushë dhe në secilin cep të Republikës së Kosovës.
13 të arrestuar dhe mbi 55 mijë euro të konfiskuara nga operacioni i koduar me emrin “TOTO”