Ministri i Brendshëm në detyrë, Xhelal Sveçla, ka përgëzuar Inspektoratin Policor të Kosovës për aksionin e djeshëm, gjatë të cilit janë arrestuar katër persona, përfshirë edhe një zyrtar i lartë të Policisë së Kosovës – një kolonel – nën dyshimet për shmangie nga tatimi.
Në një reagim në Facebook, Sveçla theksoi se krimi nuk ka vend në shoqërinë tonë, e veçanërisht jo në radhët e Policisë.
“Mbështes dhe njëkohësisht insistoj në veprime edhe më të vendosura të Inspektoratit, që radhët e Policisë të pastrohen nga elemente të tillë që njollosin emrin e institucionit më kredibil dhe me besueshmëri më të madhe në vend,” ka deklaruar ai.
Sipas tij, Policia e Kosovës duhet të jetë gjithmonë në shërbim të luftimit të krimit, e jo të shndërrohet në strehë apo mburojë për veprimtari kriminale.
Prokuroria Themelore në Prizren, në bashkëpunim me Inspektoratin Policor të Kosovës (IPK), të hënën kanë arrestuar katër persona, në mesin e tyre një kolonel Policie, nën dyshimin për përfshirje në veprat penale të detyrimit dhe shmangies nga tatimi.