Ministri i Punëve të Brendshme, Xhelal Sveçla, këtë të premte është takuar me Presidentin e Policisë Federale të Gjermanisë, Dieter Romann, me të cilin kanë biseduar për bashkëpunimin në mes të dy policive të të dyja shteteve.
Në postimin e tij, Sveçla bëri të ditur se e ka falënderuar zyrtarin gjerman për ndihmën e dhënë ndaj Policisë së Kosovës, sidomos për ndihmën me pajisje teknologjike.
“Falçnderova Dr. Romann për ndihmën e dhënë për Policinë e Kosovës si në ndihmën e vazhdueshme me paisje të ndryshme teknologjike, ashtu dhe në ngritjen e kapaciteteve njerëzore kryesisht për kontroll dhe siguri të dokumenteve, falsifikim, migrim dhe kontroll të kufirit. Theksova se përvoja e Policisë Federale Gjermane në ruajtjen dhe vëzhgimin e kufirit, luftimin e krimit në përgjithësi është jashtëzakonisht e rëndësishme për Policinë e Kosovës”, ka shkruar Sveçla.
Sveçla bëri të ditur se Presidenti i Policisë Federale theksoi se bashkëpunimi me Policinë e Kosovë ka qenë i shkëlqyer dhe se do të vazhdojë tutje me qëllim të luftimit të trafikimeve të ndryshme, shkëmbimin e informatave, përfshirë këtu edhe luftimin e migrimit ilegal.
Takimi sipas Sveçlës, ka përfunduar me ftesën drejtuar Presidentit të Policisë Federale për ta vizituar Kosovën.