Shefi i Grupit Parlamentar i Aleancës për Ardhmërinë e Kosovës (AAK), Besnik Tahiri, ka pyetur qeverinë se si është e mundur që faturat e rrymës të vijnë me çmime aq të larta, kur një megavat vitin e kaluar në tregjet ndërkombëtare është blerë dy herë më lirë.
Në seancën e jashtëzakonshme në Kuvendin e Kosovës, Tahiri ka deklaruar se ky çmim aktual i faturave të rrymës është çmimi më i lartë që paguan qytetari i Kosovës në historinë e vet.
“Si Kuvend kemi thirrë një seancë të jashtëzakonshme me një temë e një kërkesë që opozita e adreson te ky Kuvend, e që ndërlidhet me një përgjigje që ne duhet ta japim si Kuvend i Kosovës a mendojmë që çmimi i energjisë elektrike është i lirë apo i shtrenjtë. Si Kuvend i Kosovës a duhet që t’i rekomandojmë një institucioni kushtetues ZRrE-së, qeverisë, për uljen e çmimit të energjisë duke e ditur që ky çmim është çmimi më i lartë që paguan qytetari i Kosovës në historinë e vet e, po ashtu, duke e ditur që në tregjet ndërkombëtare çmimi i blerjes së një megavati është më i lirë dy herë më shumë se në vitin që shkoi”, ka thënë Tahiri.