Shefi i Grupit Parlamentar të AAK-së, Besnik Tahiri, e ka kritikuar mënyrën e funksionimit të Kuvendit të Kosovës.
Tahiri tha se shtyrja e seancës së Kuvendit ku do të vazhdojë raportimi i kryeministrit Kurti për dialog, është “hajgare”.
Ai tha se sot në orën 22:00 kur pritet të filloj seanca, askush nuk e shikon Kuvendin por të gjithë shikojnë “Bigbrother”.
“Normal që edhe ne e mbështesim seancën për në orën 10, por kjo është një hajgare e madhe se cka është ka ndodhë me këtë debat, nuk e meritojnë qytetarët e Kosovë me u sill kështu, nuk meriton një km me na lanë edhe me ardhë në 10, se në ora 10 nuk e shikon askush, të gjithë e shikojnë Bigbrother. Kjo është hajgare”, ka thënë ai.
Kurse me ironi atij iu përgjigj kryeparlamentari Glauk Konjufca, duke thënë “Humbje e madhe po thu?”.
Konjufca më tej tha se kryeministri Kurti ka qenë korrekt me deputetët e Kuvendit të Kosovës, për shkak se në fillim ka paralajmëruar se mund të qëndroj në Kuvend vetëm 3 orë.
“Kryeminsitri ka qenë korrekt, ka tregu që 3 orë mundet me qëndru dhe ju premtoj se sonte prap kthehet”, ka thënë ai.
Kryeministri i Kosovës, Albin Kurti, ka lëshuar seancën e Kuvendit në orën 16:00, ku ishte ftuar për të raportuar për dialogun me Serbinë.
Duke iu drejtuar deputetëve, Kurti ka thënë se i duhet të shkojë, por iu ka propozuar atyre që nëse e konsiderojnë shumë të rëndësishëm debatin mund të kthehet në orën 22:00 dhe të qëndrojë deri në mëngjes, transmeton Telegrafi.
“Unë tani duhet të shkoj në orën 16:00, por e kam një propozim; nëse e konsideroni shumë të rëndësishme mund të vij kur të lirohem në orën 22:00 dhe të diskutojmë deri në orën 07:00 të mëngjesit të nesërmen kur e kam takimin e parë”, ka deklaruar kreu i ekzekutivit kosovar para se të largohej nga seanca.