Shefi i Grupit Parlamentar i Partisë Demokratike të Kosovës (PDK), Abelard Tahiri, ka thënë se viti 2023 ka nisur me pasoja të retorikës së kryeministrit gjatë 2022-tës.
Me anë të një postimi në Facebook, Tahiri ka theksuar se gjatë vitit 2022, Kosova është bërë pjesë e lajmeve ndërkombëtare, por jo për të mirë.
“Përderisa në Ukrainë luftohej agresioni rus, në Kosovë flitej për luftë nga kryeministri i vendit. Nga një histori suksesi e ngritjes së një shteti modern, me retorikën e kryeministrit gjatë 2022-tës, jemi rikthyer në lajme ndërkombëtare si një vend jostabil e me rrezik për konflikte”, ka shkruar ai.
“Rezultati: ikje e të rinjve, mungesë investimesh, mungesë zhvillimi, mungesë perspektive. Vit i ri, me pasoja të një mentaliteti të vjetër”.
Sipas tij, lufta ka qenë tema qendrore dhe preteksti në kokën e kryeministrit, i cili, përmes saj, siç thotë Tahiri, ka abstenuar që t’u përgjigjet betejave të përditshme sociale dhe ekonomike me të cilat ballafaqohen qytetarët e Kosovës.
“Ta mendosh se çfarë dëmi i ka bërë kjo Kosovës, do të thotë të kesh në mendje tre parametra: Cili investitor i huaj do të rrezikonte të investonte në një vend, kryeministri i të cilit flet për luftën që na kanoset? Si mund të shpresojnë në perspektivë, të rinjtë e një vendi që qeveriset me një kryeministër të tillë?
Çfarë e ardhme ekonomike e pret një vend, kryeministri i të cilit, vizionin e vetëm e ka përballjen me luftën e tij”, shtoi Tahiri.