Ish-kryetari i Kuvendit të Maqedonisë së Veriut, Talat Xhaferi, ka pranuar sot mandatin për formimin e qeverisë.
Në llogarinë e tij në Facebook, ai ka thënë se edhe nga pozita e kryeministrit do të vazhdojë të punojë me përkushtim dhe përgjegjësi.
“Me krenari dhe nder të veçantë e pranova mandatin për formimin e qeverisë. Edhe nga pozita e kryeministrit do të vazhdoj të punoj me përkushtim, me përgjegjësi dhe transparencë, duke i pasur gjithmonë parasysh mirëqenien, përparimin dhe përfitimet e qytetarëve dhe shtetit”, ka shkruar ai.
Qeveria që drejtohej nga Dimitar Kovaçevski, më 25 janar e dorëzoi dorëheqjen në Kuvend, ndërsa këtë e bëri edhe Talat Xhaferi, në cilësinë e kryetarit të Kuvendit, për t’u hapur rrugën procedurave për kalimin e tij në krye të qeverisë teknike.
Kuvendi i Maqedonisë së Veriut, të premten, konstatoi dorëheqjen e qeverisë, ndërsa Jovan Mitreski nga LSDM-ja është zgjedhur për kryetar të ri të Kuvendit.
Kryeministri i parë shqiptar i Maqedonisë së Veriut, Talat Xhaferi, pritet të votohet më së voni deri më 28 janar.