Valentina Demolli nga Këshilli për Mbrojtjen e të Drejtave dhe Lirive të Njeriut (KMDLNJ), ka bërë të ditur se ish-kryetari i OVL e UÇK-së, Hysni Gucati, do t’i nënshtrohet sot (e hënë) një operacioni.
Ndër të tjera, Demolli për RTV Dukagjini, ka njoftuar se ky intervenim kirurgjik do të bëhet në Holandë.
“Hysni Gucati, i dënuar me 4,5 vjet burg nga Gjykata Speciale në Hagë, kishte probleme të theksuara shëndetësore edhe para arrestimit, ndërsa gjatë qëndrimit në paraburgim, i ishte përkeqësuar gjendja shëndetësore, dhe për këtë, KMDLNJ ka reaguar publikisht sikur që e ka përfshirë këtë edhe në raportin për monitorim”, thuhet në reagimin e KMDLNJ, raporton EO.
“Gjykata Speciale, shkaku se operacioni ka qenë i kushtueshëm ka qenë hezituese, duke pritur rezultatin e gjykimit. Pasi Hysni Gucati u dënua thuajse me dënim që kishte kërkuar Prokurori i Specializuar dhe pasi i ishin refuzuar të gjitha kërkesat për lirim nga paraburgimi, në mënyrë që të trajtohet jashtë Burgut të Hagës, para një kohe ishte marrë vendim të operohet, pa e caktuar kohën e saktë”, thuhet tutje.