Presidenti i Shteteve të Bashkuara të merikls, Donald Trump, ka nënshkruar një urdhër ekzekutiv që autorizon aplikimin e dënimit me vdekje në kryeqytetin federal, Uashington D.C.
Sipas Shtëpisë së Bardhë, ky vendim synon zbatimin e plotë të ligjeve federale për këtë dënim dhe u jep prokurorëve federalë të drejtën të kërkojnë këtë masë në të gjitha rastet e përshtatshme.
Trump ka udhëzuar gjithashtu prokurorin e përgjithshëm dhe prokurorin e kryeqytetit që të shfrytëzojnë juridiksionin federal në maksimum për krimet që parashohin këtë lloj dënimi.
“Presidenti Trump nënvizon përkushtimin e tij për mbrojtjen e të gjithë amerikanëve që jetojnë dhe vizitojnë në kryeqytet, duke siguruar që kriminelët më të rrezikshëm të përballen me pasojat më të rënda sipas ligjit”, thuhet në deklaratën e Shtëpisë së Bardhë.
Uashingtoni, i njohur për shkallën e lartë të kriminalitetit, renditet si një nga qytetet më të rrezikshme në SHBA, me nivel krimi gati gjashtë herë më të lartë se ai i Nju Jorkut.