Presidenti Donald Trump shkarkoi të premten komisioneren e Byrosë së Statistikave të Punës, disa orë pasi agjencia raportoi se rritja e vendeve të punës në SHBA ishte ngadalësuar pothuajse në ndalesë.
Në një postim në Truth Social, ku kritikoi ashpër Kryetarin e Rezervës Federale, Jerome Powell, Trump akuzoi Komisioneren e BLS-së, Erika McEntarfer, se ishte një e emëruar politike që po manipulonte të dhënat e vendeve të punës.
“Sapo më informuan se ‘Numrat e Punësimit’ të vendit tonë po prodhohen nga një e emëruar nga Biden, Dr. Erika McEntarfer, Komisionere e Statistikave të Punës, e cila i falsifikoi këto numra para zgjedhjeve për të rritur shanset e Kamala-s [Harris-it] për fitore,” shkroi Trump.
“Na duhen shifra të sakta për vendet e punës. I kam udhëzuar ekipin tim që ta shkarkojë MENJËHERË këtë të emëruar politike të Bidenit. Ajo do të zëvendësohet me dikë shumë më kompetent dhe të kualifikuar,” shtoi ai.
Një zëdhënës i byrosë i tha CNBC-së: “BLS mund të konfirmojë se Komisionerja Erika McEntarfer u shkarkua sot. Zëvendës Komisioneri William Wiatrowski do të shërbejë si Komisioner i Përkohshëm për BLS.”
BLS vepron nën varësinë e Departamentit të Punës, komisionerja e të cilit, Lori Chavez-DeRemer, është e emëruar nga Trump.
Lëvizja erdhi në të njëjtën ditë kur BLS raportoi një rritje prej vetëm 73,000 vendeve të punës jo-bujqësore në korrik, nën pritjet e tregut.
Përveç kësaj, byroja rishikoi ndjeshëm dy muajt e mëparshëm, duke ulur me 258,000 numërimet e mëparshme dhe duke e çuar normën e rritjes tremujore në një shifër të vogël prej 35,000. Ishte rishikimi më i madh dy-mujor në rënie që nga prilli 2020, ditët e para të krizës së Covid-it.
Trump dhe republikanët e Kongresit kanë kritikuar vazhdimisht BLS-në për mënyrën e mbledhjes së të dhënave. Rishikimet e mëdha kanë qenë objekt kritikash të përsëritura. Trump theksoi se BLS vitin e kaluar kishte njoftuar gjithashtu rishikime të mëdha, duke ulur me 818,000 rritjen e pagave 12-mujore para marsit 2024.
Në planin e tij të shpenzimeve këtë vit, Trump propozoi një ulje prej 8% të stafit në byro, duke ngritur pikëpyetje mbi integritetin e statistikave mbi punësimin, çmimet e konsumit dhe metrika të tjera ekonomike. Byroja është detyruar të përfshijë një sasi gjithnjë e në rritje të të dhënave të vlerësuara në raportet e saj.
“Numrat e rëndësishëm si ky duhet të jenë të drejtë dhe të saktë, nuk mund të manipulohen për qëllime politike,” shkroi presidenti. “McEntarfer tha se u shtuan vetëm 73,000 vende pune (një tronditje!), por më e rëndësishmja është se ata bënë një gabim të madh, duke ulur me 258,000 vende pune dy muajt e mëparshëm. Gjëra të ngjashme ndodhën edhe në pjesën e parë të vitit, gjithmonë në negativ.”
Përpara raportit të së premtes, Trump kishte mbështetur forcën e tregut të punës. Pas publikimit të shifrave të qershorit, Shtëpia e Bardhë e quajti atë një “bum të qershorit.”
Raporti i dobët i punësimit i premten i parapriu një rënie të ndjeshme të tregjeve, me Indeksin Industrial Dow Jones që ra më shumë se 500 pikë dhe Indeksin Nasdaq, të fokusuar në teknologji, që ra mbi 2%. Edhe rendimentet e obligacioneve të thesarit ranë.
“Nuk mund ta besoj atë që sapo pashë,” tha Peter Mallouk, president dhe drejtor investimesh i Creative Planning. Postimi i Trump në mediat sociale në fillim dukej si parodi ose satirë, tha Mallouk.
“Kjo nuk është e shëndetshme,” shtoi ai. “Nuk mund të nxjerrim një sërë shifrash dhe të shkarkojmë dikë që ka shërbyer në administrata të ndryshme, sepse nuk na pëlqejnë shifrat.”
William Beach, një i emëruar nga Trump në vitin 2017 dhe paraardhësi i menjëhershëm i McEntarfer në BLS, kritikoi ashpër shkarkimin e saj.
“Shkarkimi krejtësisht i pabazuar i Dr. Erika McEntarfer, pasardhëses sime si Komisionere e Statistikave të Punës në BLS, vendos një precedent të rrezikshëm dhe minon misionin statistikor të Byrosë,” postoi Beach në X.
“Kjo përshkallëzon sulmet e paprecedentë të Presidentit ndaj pavarësisë dhe integritetit të sistemit statistikor federal,” shtoi ai. “Presidenti kërkon të fajësojë dikë për lajmet e padëshiruara ekonomike.”
Së bashku me kritikat ndaj McEntarfer dhe BLS, Trump për të paktën herën e tretë të premten iu kundërvu Powell-it të Rezervës Federale, i cili mbështet idenë që banka qendrore të mos ulë normat e interesit derisa të ketë një ide më të qartë sesi tarifat e presidentit do të ndikojnë në inflacion.
“Ekonomia po lulëzon nën ‘TRUMPIN’ pavarësisht një Rezerve Federale që po luan lojëra, këtë herë me normat e interesit, të cilat i uli dy herë dhe në mënyrë të konsiderueshme pak para zgjedhjeve presidenciale, me shpresën e zgjedhjes së ‘Kamalës’ – Si funksionoi kjo?” shkroi Trump. “Jerome ‘Tepër Vonë’ Powell gjithashtu duhet të nxirret ‘në kullotë’.”
Komiteti Federal i Tregut të Hapur, krahu i politikës monetare të bankës qendrore, votoi të mërkurën për të mbajtur të qëndrueshme normën e interesit bazë, aty ku ka qenë që nga dhjetori.
Megjithatë, pas raportit të dobët të vendeve të punës, tregjet e kontratave të ardhshme vlerësuan një mundësi të fortë që Rezerva Federale të ulë normën e interesit në shtator.