Senatori kolumbian Miguel Uribe, 39 vjeç, ka ndërruar jetë të hënën, pasi ishte shtruar në spital që nga qershori, kur u qëllua në kokë gjatë një aktiviteti zgjedhor në kryeqytetin Bogota.
Lajmin e ka konfirmuar familja e tij. Uribe, kandidat potencial presidencial nga opozita e krahut të djathtë, u sulmua më 7 qershor, gjatë një tubimi elektoral. Ai iu nënshtrua disa operacioneve kirurgjikale, por nuk arriti t’i mbijetonte plagëve.
Gruaja e tij, Maria Claudia Tarazona, e ka shprehur dhimbjen në rrjetet sociale: “I lutem Zotit të më tregojë rrugën për të mësuar të jetoj pa ty. Pusho në paqe, dashuria e jetës sime, unë do të kujdesem për fëmijët tanë.”
Vdekja e Uribes shton një tjetër tragjedi në historinë e familjes së tij. Në vitin 1991, nëna e tij, gazetarja Diana Turbay, u vra gjatë një operacioni të dështuar shpëtimi, pasi ishte rrëmbyer nga Karteli i Medellinit, i udhëhequr nga Pablo Escobar.
Uribe kishte njohur një ngritje të shpejtë politike. Në moshën 25-vjeçare u zgjodh në Këshillin Bashkiak të Bogotës, ku u bë një kritik i fortë i kryebashkiakut të atëhershëm, Gustavo Petro, për menaxhimin e mbeturinave dhe programet sociale.
Në zgjedhjet legjislative të vitit 2022, ai kryesoi listën e kandidatëve për Senat të partisë së krahut të djathtë Qendra Demokratike, me sloganin “Kolumbia e Para”, duke siguruar një ulëse.
Familja e tij ka një trashëgimi të gjatë politike: gjyshi nga nëna, Julio Cesar Turbay, ishte president i Kolumbisë nga 1978 deri më 1982, ndërsa gjyshi nga babai, Rodrigo Uribe Echavarria, ka udhëhequr Partinë Liberale dhe ka mbështetur fushatën fituese të presidentit Virgilio Barco në vitin 1986.