Lëvizja Vetëvendosje (LVV) ka paraqitur të martën ankesë në Gjykatën Supreme kundër vendimit të Panelit Zgjedhor për Ankesa dhe Parashtresa (PZAP), i cili e ka obliguar Komisionin Qendror Zgjedhor (KQZ) që ta certifikojë Listën Serbe si subjekt politik për zgjedhjet lokale të 12 tetorit.
Vendimi i PZAP-së, i marrë të dielën, anuloi refuzimin e mëhershëm të KQZ-së për certifikimin e Listës Serbe, me arsyetimin se nuk ishte dëshmuar bindshëm se disa nga kandidatët e saj nuk i përmbushnin kriteret ligjore.
Mirëpo, Vetëvendosje këtë vendim e ka quajtur të padrejtë, të pasaktë dhe manipulues, duke theksuar se Lista Serbe ka paraqitur të dhëna jo të plota dhe madje të rreme gjatë procesit të aplikimit.
Në ankesën e dorëzuar nga përfaqësuesit e saj në KQZ, Sami Kurteshi dhe Alban Krasniqi, LVV ka argumentuar se anëtarët e KQZ-së kanë të drejtë ekskluzive ligjore për të vendosur mbi certifikimin e subjekteve politike, sipas nenit 17 të Ligjit për Zgjedhjet e Përgjithshme. Sipas tyre, PZAP ka tejkaluar kompetencat duke imponuar certifikimin e Listës Serbe.
Ndërkohë, vendimi i KQZ-së i 21 gushtit për refuzimin e certifikimit ishte kritikuar nga vendet e QUINT-it dhe Bashkimi Evropian, të cilat kanë kërkuar që Lista Serbe të mos pengohet në procesin zgjedhor. Kjo parti, e mbështetur nga Beogradi, ka vendosur të garojë në zgjedhjet lokale të tetorit pas bojkotit në zgjedhjet e mëparshme, që solli zgjedhjen e kryetarëve shqiptarë në katër komunat veriore me shumicë serbe.
