Përderisa në Evropë po shënohen temperatura rekorde të të nxehtit, në Kinë, qytetet dhe tokat bujqësore janë vërshuar nga përmbytjet, kështu duke arritur që të stabilizohet nxehtësia e madhe që ka kapluar qytetet dhe provincat kineze.
Që nga fillimi i sezonit të reshjeve të vendit në muajin maj, stuhitë e mëdha të shiut kanë sjellë përmbytje të rënda dhe rrëshqitje të dheut në zona të mëdha të Kinës jugore, duke zhvendosur dhe vrarë qindra njerëz dhe duke shkaktuar humbje ekonomike që arrijnë në miliarda juanë.
Ndërsa në qershor, reshjet ekstreme kanë thyer “rekordet historike” në provincën bregdetare Fujian, si dhe në pjesë të provincave Guangdong dhe Guangxi.
Në të njëjtën kohë, një valë e nxehtë ka filluar të mbështjellë Kinën veriore, kështu duke shkuar temperaturat mbi 40 gradë Celsius (104 Fahrenheit).
Kjo valë e të nxehtit tani ka përfshirë gjysmën e vendit, duke prekur më shumë se 900 milionë njerëz ose rreth 64 për qind të popullsisë.
Të gjitha, përveç dy provincave verilindore në Kinë, kanë lëshuar paralajmërime për temperatura të larta, me 84 qytete që kanë lëshuar alarmet e tyre të kuqe të nivelit më të lartë të mërkurën e kaluar.
Nxehtësia e madhe ka përkuar me një rritje të rasteve me Covid, duke e bërë testimin masiv të mandatuar nga Qeveria kineze edhe më torturues për banorët, përfshirë të moshuarit, të cilët duhet të presin në radhë të gjata nën diell.
Po ashtu, kjo është bërë një detyrë e rrezikshme edhe për punonjësit e shëndetësisë, të cilëve, si pjesë e politikës së qeverisë ‘zero-Covid’, u kërkohet të kalojnë orë të gjata jashtë të mbuluar kokë e këmbë në pajisje PPE hermetike ndërsa administrojnë testet.
