Kandidati i VLEN-it për Komunën e Çairit, Izet Mexhiti, ka shpallur fitoren në këtë komunë, duke theksuar se kjo përfaqëson një klasë të re politike, ndërsa kundërshtarët e tij politikë “shkuan në pension”.
Gjatë fjalës së tij, Mexhiti iu drejtua edhe Ali Ahmetit nga BDI, duke kërkuar të tërhiqet nga politika, pasi sipas tij, votat e qytetarëve e çuan në pension.
“Në Çair fituan të gjithë shqiptarët. Urime pensionimin kundërshtarëve politikë. Fitorja jonë nuk është personale, por është fitore e një klase politike që sjell ndryshim. Faleminderit shqiptarë. Kjo është fitore e dinjitetit qytetar dhe e shpresës që qytetarët e fituan me votë të lirë. Falënderojmë institucionet që garantuan një proces të qetë dhe demokratik”, ka theksuar ai.
Ndërkohë, nënkryetari i BDI-së, Arbër Ademi, shpalli fitoren në komunat e Likovës dhe Pllasnicës.
“E fillojmë fitoren e madhe me fitore në raundin e parë në dy komuna, dhe atë në Likovë ku ka mbaruar procesi zgjedhor dhe kandidati jonë Erkan Arifi ka fituar. Po ashtu edhe në Pllasnicë ka fituar kandidati jonë”, ka thënë Ademi.