Zëvendësministri i Ministrisë së Administrimit të Pushtetit Lokal (MAPL), Arbër Vokrri, në lidhje me djegien e dy veturave zyrtare në Komunën e Zveçanit ka thënë se gjestet e tilla nuk i zmbrapsin qytetarët e Kosovës.
Në emisionin “FIVE”, Vokrri ka thënë se djegia e dy veturave në orët e hershme të mëngjesit të sotëm nga persona të maskuar në Zveçan është shfrytëzim nga strukturat paralele serbe me situatën e re të krijuar në veri që të distancohen nga qytetarët serbë të Kosovës, të cilën dëshirojnë normalitet e integrim.
Sipas tij, ky akt nuk lidhet drejtpërdrejt me përvjetorin e rënies së heroit, Enver Zymerit.
“Ajo që ndodhi mbrëmë nuk mendoj që lidhet drejtpërdrejt me përvjetorin e Enver Zymerit, shfrytëzim nga strukturat paralele serbe me situatën e re të krijuar në veri që të distancohen. Gjestet e tilla vandale nuk e zmbrapsin qytetarin e Kosovës që vazhdon të kërkojë normalitetin”, ka deklaruar Vokrri.
Policia e Kosovës në mëngjesin e 26.07.2024, bëri të ditur se kanë nisur hetimet për djegien e dy veturave komunale.
Raste të djegieve të veturave në veri të vendit janë regjistruar edhe më herët në veri.