Bujar Osmani nga BDI-ja, ish-kandidat për president të Maqedonisë së Veriut nga koalicioni “Fronti Evropian”, ka votuar sot në Maqedoninë e Veriut ku po mbahen zgjedhjet presidenciale dhe ato parlamentare.
Ai ka thënë se këto zgjedhje janë vendimtare për të ardhmen e shtetit, duke ftuar qytetarët të dalin masivisht në votime.
Sipas Osmanit, me anë të këtyre zgjedhjeve përcaktohet edhe përkushtimi i Maqedonisë së Veriut drejt integrimit evropian.
“Sot në një ditë jashtëzakonisht të rëndësishme për vendin, si rrallëherë, vendosim për drejtime kundërthënëse për shtetin, sot nuk zgjedhim vetëm përfaqësuesit e shtetit, forcojmë të ardhmen e shtetit, përcaktohemi për përkushtimin ndaj integrimit evropian, bashkëjetesës dhe tolerancës ndëretnike për fqinjësi të mirë, unë shpresoj që qytetarët do dalin masivisht në votime, dhe sonte mund të themi Maqedonia e Veriut vazhdon rrugëtimin evropian”, ka deklaruar Osmani para mediave.
Qytetarët e Maqedonisë së Veriut kanë filluar të votojnë mëngjesin e së mërkurës për ta zgjedhur presidentin dhe Parlamentin e ri të vendit në zgjedhje të dyfishta.