Një person ka vdekur dhe dy të tjerë janë plagosur nga një sulm me thikë dhe çekiç në një rrugë në qendër të Parisit.
Sulmi ndodhi në Quai de Grenelle, pranë Kullës Eifel, rreth orës 21:00, të shtunën.
Siç shkruan BBC, një shtetas francez, 26-vjeçar i njohur për shërbimet e sigurisë është arrestuar dhe prokurorët e antiterrorizmit kanë nisur një hetim.
Zyrtarët konfirmuan se personi i vrarë ishte një shtetas gjerman.
Ministri i Brendshëm i Francës, Gerald Darmanin tha se viktima, i lindur në vitin 1999, ishte me gruan e tij kur u sulmua dhe u godit me thikë për vdekje.
Ai tha se jeta e gruas u shpëtua nga ndërhyrja e një shoferi taksie dhe se i dyshuari iku përmes një ure aty pranë që përshkon lumin Seine.
Burri më pas sulmoi dy persona të tjerë, duke goditur njërin në sy me çekiç, tha ministri.
I dyshuari më pas u arrestua me dyshimin për atentat – i përcaktuar në ligjin francez si vrasje me paramendim – dhe tentativë për atentat në lidhje me një sipërmarrje terroriste.
Dy personat e plagosur – një francez rreth 60 vjeç dhe një turist i huaj – u trajtuan nga shërbimet e urgjencës, dhe asnjëri nuk është në rrezik për jetën.