Presidenti i Serbisë, Aleksandar Vuçiq, ka ftuar përfaqësuesit e protestuesve që të marrin pjesë në një debat publik, i cili, sipas tij, mund të transmetohet drejtpërdrejt në të gjitha televizionet dhe portalet.
Ftesën e ka bërë përmes një videoje të publikuar në Instagram sot më 22 gusht.
Studentët e Fakultetit Filozofik të Universitetit të Beogradit, që udhëheqin protestat, e kanë refuzuar menjëherë këtë ftesë. Ata kanë deklaruar se do të bisedojnë me presidentin vetëm pasi ai të shpallë zgjedhje të reja.
“Është e qartë se nuk ka përgjigje ndaj revoltës së popullit, prandaj tani dëshiron të flasë me ne, të cilët për muaj me radhë na ka quajtur terroristë. Për vizionet dhe programet për të ardhmen do të diskutojmë gjatë fushatës zgjedhore, kur të shpallë zgjedhje”, thuhet në reagimin e tyre.
Protestat në Serbi kanë hyrë në muajin e nëntë, me kërkesë kryesore përcaktimin e përgjegjësisë për shembjen e strehës prej betoni në Stacionin Hekurudhor të Novi Sadit, ku humbën jetën 16 persona. Studentët insistojnë se zgjedhjet e parakohshme janë të pashmangshme, pasi autoritetet nuk kanë ndërmarrë asnjë veprim për të vendosur përgjegjësi pas tragjedisë.
Megjithatë, pushteti në Serbi ka refuzuar deri më tani që të shpallë zgjedhje të reja. Në videon e tij, Vuçiq tha se protestat kanë nisur fillimisht si kërkesa për drejtësi, por më pas janë shndërruar në thirrje për ndryshime politike.
Ai shtoi se, pavarësisht se nuk pajtohet me kërkesat e tyre, është e rëndësishme që palët të dëgjojnë njëra-tjetrën.
“Mendoj se është vendimtare të rifillojmë dialogun në Serbinë tonë dhe të dënojmë dhunën në rrugë”, është shpreh Vuçiq.