Presidenti i Serbisë, Aleksandar Vuçiq, nëpërmjet një postimi në Instagram, ka thënë se mesazhi i tij për serbët në Kosovë është të mos dorëzohen.
Vuçiq ka thënë se qytetarët serbë “sërish janë detyruar të mbrojnë të drejtat e tyre me barrikada”.
“Nuk ka dhe nuk do të ketë dorëzim, ky është vendimi i Serbisë dhe mesazhi im për popullin tonë në Kosovë, i cili edhe një herë është i detyruar të mbrojë vatrat e tyre në barrikada”, ka shkruar ai.
Po ashtu, ai ka bërë thirrje që të themelohet Asociacioni i komunave me shumicë serbe.
“Mesazhi për të gjithë të tjerët është që të formohet Asociacioni, të respektohen të drejtat dhe liritë e serbëve dhe të Serbisë, dhe të sillen në përputhje me marrëveshjet e nënshkruara dhe të drejtën ndërkombëtare, sepse vetëm kështu mund të fillohet normalizimi i marrëdhënieve dhe jetës së të gjithë neve”, ka shkruar tutje ai.
Ai ka përfunduar duke thënë se do të vazhdojnë luftën me të gjitha mjetet ligjore për paqen, “për një jetë më të mirë dhe të ardhmen e fëmijëve tanë”, dhe sipas tij, “Serbia do të fitojë”.