Një rast i pazakontë ka ndodhur në Beograd, ku në Qeverinë e Serbisë ka mbërritur një zarf i adresuar për ministrin e Brendshëm, Ivica Daçiq.
Brenda zarfit janë gjetur tre plumba, ka bërë të ditur Ministria e Punëve të Brendshme serbe më 29 gusht.
Sipas njoftimit, dërgesa është zbuluar të enjten gjatë procesit të rregullt të ndarjes së postës, ku kontrolli i sigurisë me rreze X ka evidentuar prezencën e plumbave.
“Ministria e Punëve të Brendshme njofton publikun se dje, më 28 gusht 2025, gjatë ndarjes së rregullt të postës në ndërtesën e Qeverisë së Republikës së Serbisë, u vu re një zarf i adresuar Zëvendëskryeministrit dhe Ministrit të Punëve të Brendshme Ivica Daçiq.
Gjatë kontrollit të sigurisë së dërgesës në pajisjen me rreze X, në zarf u gjetën tre plumba”, thuhet në njoftim.
Autoritetet serbe kanë njoftuar se policia ka arritur të identifikojë dhe lokalizojë personin që e kishte dorëzuar dërgesën më 26 gusht në një degë të Postës së Serbisë në Pozharevc.
Megjithatë, nuk është bërë i ditur identiteti i të dyshuarit.
“Është konfirmuar se dërgesa e përmendur është dorëzuar më 26 gusht 2025 në zyrën e Postës së Serbisë në Pozharevc.
Policia identifikoi dhe gjeti personin që dorëzoi pakon, dhe puna e mëtejshme për të përcaktuar të gjitha rrethanat e incidentit është duke vazhduar.
Ministria e Punëve të Brendshme po ndërmerr të gjitha masat dhe veprimet e përcaktuara me ligj për të mbrojtur sigurinë e qytetarëve dhe institucioneve të Republikës së Serbisë”, thuhet më tej në njoftim.
