Një 13-vjeçar është kapur me armë zjarri në një shkollë të Ferizajt të enjten, ka konfirmuar për Dukagjinin zëdhënësi i Policisë Rajonale, Kanun Veseli.
Sipas tij, i mituri ishte parë duke mbajtur një pistoletë, çka ka bërë që autoritetet të reagojnë menjëherë. Gjatë kontrollit, arma e zjarrit është gjetur pa fishekë dhe më pas është konfiskuar nga policia.
Hetimet fillestare kanë treguar se arma ishte në pronësi të prindit të të miturit, i cili posedon leje të rregullt për mbajtjen e saj.
Për shkak të moshës, 13-vjeçari nuk është intervistuar nga policia, në përputhje me legjislacionin për trajtimin e të miturve.
Policia e Kosovës ka bërë apel për të gjithë poseduesit e armëve me leje, veçanërisht prindërit, që t’i mbajnë armët e tyre në mënyrë të sigurt dhe të parandalojnë qasjen e fëmijëve apo personave të paautorizuar, për të mbrojtur jetën dhe sigurinë publike.