Ministria e Mbrojtjes e Shqipërisë ka paralajmëruar se sot(e premte) me 26 korrik, do të jetë dita me rrezikun më të lartë të zjarreve në gjithë territorin e vendit.
Ky vlerësim është bërë mbi bazën e të dhënave të siguruara nga Agjencia Kombëtare e Mbrojtjes Civile, IGJEUM dhe Qendra e Koordinimit të Emergjencave Civile të Bashkimit Evropian.
Në një njoftim zyrtar, Ministria njofton se Komiteti i Mbrojtjes Civile u ka kërkuar të gjitha strukturave shtetërore të rrisin gatishmërinë operative dhe të forcojnë bashkëpunimin ndërinstitucional, me qëllim përballimin sa më efikas të çdo emergjence të mundshme.
“Qytetarët duhet të shmangin çdo veprim që mund të shkaktojë zjarr në ambiente të hapura dhe të raportojnë menjëherë rastet e dyshimta pranë autoriteteve përkatëse”, thuhet në deklaratë.
Sipas autoriteteve, situata e krijuar është rezultat i kombinimit të temperaturave ekstreme dhe erërave të forta, të cilat favorizojnë përhapjen e shpejtë të flakëve.
Ministria apelon për vigjilencë të lartë si nga institucionet ashtu edhe nga qytetarët, në mënyrë që të shmangen pasojat e rënda që mund të shkaktojë një shpërthim zjarri në kushtet aktuale.