Erërat e forta që kanë përfshirë një pjesë të vendit që nga mëngjesi i sotëm kanë shkaktuar dëme në rrjetin elektrik shpërndarës, duke lënë pa energji elektrike një numër të konsiderueshëm konsumatorësh.
Sipas KEDS-it, rajonet më të prekura janë Peja, Mitrovica, si dhe disa zona të Prishtinës, Gjakovës dhe Prizrenit.
Në një njoftim publik KEDS ka bërë të ditur se ekipet teknike tashmë ndodhen në terren për të intervenuar në lokalitetet e prekura, ku përveçse po kujdesen për sigurinë e sistemit, janë duke punuar pa ndërprerje për rikthimin e furnizimit me energji elektrike.
KEDS ka kërkuar mirëkuptimin e konsumatorëve të prekur nga kjo situatë, duke theksuar se angazhimi për normalizim të gjendjes po bëhet me përkushtim maksimal.