Rrushe Qorraj, 76-vjeçarja nga Drelaj e Rugovës, edhe pse në moshë, ka forcë dhe vullnet për të jetuar dhe vitet i konsideron vetëm numër.
“Vetëm të isha tani 50 vjeçe, do të isha kënaqur ende më shumë”, kështu e fillon Rrushe Qorraj rrëfimin e saj për RTV Dukagjinin. Ajo tregoi se shëndeti i mirë vjen si pasojë e qëndrimit në bjeshkë.
Qorraj ka treguar se ditën e fillon me një birrë të cilën e konsumon prej 40 vjetësh, ndërsa ushqimi që e konsumon dhe e përgatit vetë është lakrori me hithra.
Sfida e fundit shëndetësore për 76- vjeçaren ishte para dy vjetësh, kur u përball me virusin Covid-19, të cilin e tejkaloi në shtëpi përmes përkujdesjes së familjarëve.
“Djali i ka dërguar mjekët në shtëpi dhe unë nuk shkova në spital”, është shprehur ajo.
Rrushe Qorraj nuk pajtohet me banorët që janë zhvendosur në qytet duke thënë se fshati Drelaj nuk është larg qytetit të Pejës dhe ia vlen të jetohet aty.